Диди бара милост: По изрекувањето на пресудата, адвокатите на раперот бараат 14-месечна затворска казна

Помина повеќе од една година откако музичкиот могул Шон Диди Комбс беше уапсен во хотелот Парк Хајат на Менхетен, по обвинението од големата порота.

Судењето на Комбс за трговија со луѓе за целите на сексуална експлоатација започна претходно оваа година. Во јули, тој беше прогласен за виновен по две точки за транспорт за целите на проституција, но беше ослободен од посериозни обвиненија за трговија со луѓе и рекетирање. Познатиот рапер и продуцент, кој тврди дека е невин, најави жалба на пресудата.

Иако се соочува со максимална казна од 20 години затвор, неговиот правен тим се надева на значително полесна казна.

Во поднесок од 22 септември, адвокатите на Комбс побараа од судијата да го осуди на 14 месеци затвор, по што ќе следи условно ослободување, пренесува „Скај њуз“.

Условите би вклучувале задолжителен третман за зависност, терапија и групно советување.

Одбраната верува дека таквата казна би била „доволна, но не повеќе од потребната“.

Со оглед на времето што веќе го помина во притвор, ова би можело да значи негово итно ослободување по изрекувањето на пресудата, пренесе 24sedam.

Од друга страна, обвинителството има рок до 29 септември да ја даде својата препорака и веќе објави дека верува дека е оправдана „значајна“ затворска казна. Сепак, тие признаа дека федералните упатства препорачуваат казна до пет години. Се очекува американскиот окружен судија Арун Субраманијан да донесе конечна пресуда на 3 октомври.

Како дел од поднесувањето, правниот тим приложи дури 70 писма за поддршка од најблиските на Комбс, вклучувајќи ги и членовите на семејството.

Во документите се наведува дека музичарот се отрезнил во затвор по долга борба со зависноста од дрога и алкохол, и дека неговата 84-годишна мајка Џенис и седумте деца се финансиски зависни од него.

И неговата мајка Џенис апелираше до судијата, молејќи го да ѝ дозволи да ги помине преостанатите години со својот син, признавајќи дека тој „направил некои ужасни грешки“.

Адвокатите нагласија дека Комбс се однесувал примерно во затворот и не предизвикал никакви инциденти.

Во поднесокот се наведува:

„Во текот на изминатите две години, кариерата и угледот на г-дин Комбс беа уништени. Тој помина повеќе од една година во еден од најозлогласените затвори во Америка, но сепак ја искористи казната на најдобар можен начин“, се вели во него, додавајќи: „Едноставно кажано, поротата се изјасни. Нејзината пресуда е потврден показател за невиност. Време е г-дин Комбс да се врати дома кај своето семејство за да може да продолжи со лекувањето и да се обиде да го искористи максимално следното поглавје од неговиот извонреден живот… Тоа е единствената праведна и фер казна што може да се изрече.“