Џепчија застанат во ред со пациенти на Клиниката за онкологија од велешанец кој чекал терапија украл 800 евра. Од Јавното обвинителство соопштуваат дека крадецот се инфилтрирал меѓу пациентите и искористувајќи го нивното невнимание и маката со која се соочуваат ги крадел и не му било прв пат. Кражбата се води како дрска и ЈО бара мерка притвор.
”Основното јавно обвинителство Скопје поведе постапка против 60-годишник осомничен за кривично дело – Тешка кражба од член 236 став 1 точка 3 од Кривичниот законик. Кражбата ја извршил на Клиниката за радиотерапија и онкологија, каде искористил невнимание на еден пациент од велешко, ја протнал раката во неговиот џеб и одзел 300 евра и 28.000 денари. Пациентот малку подоцна забележал дека му се украдени парите и пријавил во полиција, а сторителот бил идентификуван од снимките на видео камерите во болницата.
Имајќи предвид дека сторителот бил и претходно осудуван, како и дрскоста со која делото сега го извршил во медицинска установа во која во исто време поголем број пациенти во тешка состојба, меѓу кои и оштетениот, чекале да примат терапија од која им зависи животот, јавниот обвинител на судијата на претходна постапка му предложи да определи мерка притвор за осомничениот” соопштуваат од ЈО
