Девет тажни години од смртта на Кралицата Есма Реџепова

Се навршија девет многу тажни години од смртта на Есма Реџепова, неприкосновената „кралица на ромската музика“, од нејзиното физичко заминување од овој свет. Почина на 73-годишна возраст, по кусо боледување, оставајќи зад себе огромно музичко наследство. Есма е петто од шесте деца на семејството Реџепови, кои живееле сиромашно во центарот на Скопје. Првите чекори во професионалната кариера ги направила на 13-годишна возраст, кога победи на натпревар во скопски Сарај. Легендарниот Стево Теодосиевски ѝ станал прво нејзин ментор, композитор, продуцент и водич низ естрадата, а потоа и сопруг. Есма имаше мошне богата кариера, а зад себе остави повеќе од 600 песни на ромски, македонски, српски, турски, арапски, германски, руски, француски, грчки, хебрејски… јазик. Одржа и преку 22.000 концерти, од кои многу беа хуманитарни. За пазарот на грамофонски плочи издаде108 синглови, 32 компакт-дискови, 15 албуми, шест видеокасети и неброено многу телевизиски емисии.

Песните „Чаје Шукарије“ и „Џелем џелем“ станаа неофицијални химни на Ромите ширум светот. Индира Ганди ја прогласи за Кралица на Ромите, а беше и кандидирана за Нобелова награда за мир. Во приватниот живот, Есма немала свои биолошки деца, но посвоила и одгледала 47 деца, кои растеле и се образовале во рамките на ансамблот „Теодосиевски“. Останува да ја памтиме засекогаш и по нејзините добрини и грижи за обичните, секојдневни луѓе. Затоа што таа секогаш велеше и го практикуваше она – „Ако имам за мене, ќе имам и за тебе“.

(Д. М.)