Детален долгорочен план за заштита и поголеми права на вработените

Во мислењето што го доставија синдикатите на вработените во Стопанска банка АД Битола за понудата за преземање на Банката од страна на Алта банка АД Белград, се наведува дека е прифатлива понудата, но под одредени услови, кои се однесуваат на заштита и унапредување на правата на вработените.

Тие бараат од српската банка да им достави детален долгорочен план за вработените, со јасна визија за нивно унапредување и соодветно наградување, вклучително и зголемување на платата. Оттаму, пак, најавија дека, по преземањето, ќе работат на зголемување на обемот на активностите и на раст на бројот на вработени. Од синдикатите сметаат дека ова е можност за модернизација на работењето и за подобрување на корисничкото искуство.

– Прифаќањето на понудата е условено од хоризонталната прераспределба на вработените во однос на потребите на Банката и од вертикалната прераспределба исклучиво во насока на раст и унапредување, без намалување на хиерархиските нивоа. Сметаме дека успешната реализација на преземањето ќе влијае и врз стабилноста на Банката – очекуваат синдикатите.