Десет години Креативен центар Карпош

Креативниот центар Карпош на 22 септември ќе го одбележи јубилејот 10 години постоење. Во рамките на одбележувањето, кое ќе се одржи во ООУ „Владо Тасевски“ во Козле, ќе биде промовиран и првиот број на списанието на овој детски центар, насловено „Креативци“.

– Креативниот центар Карпош во изминатите 10 години беше промотор на младите во Општина Карпош, во многу сфери на науката, истражувањето и на културата. Во овој период, тој организираше преку 100 работилници со повеќе од 1.500 учесници, реализираше неколку домашни и меѓународни истражувачки проекти, сними документарен филм под наслов „Едно е да знаеш, а друго да умееш“, го промовираше креативниот ангажман на младите од Карпош низ Македонија и регионот и беше дел од бројни други настани (конференции, саеми, симпозиуми…) – посочува, меѓу другото професор, Александра Блажевска, претседател на Креативниот центар Карпош.

Според Зоран Поповски, основач на Центарот, овој центар е таков зрак за иднината кој упорно се бори да го забави процесот на дехуманизација на младите во општина Карпош.

– Неговата мисија e да ги поттикне децата, односно учениците да го истражуваат непознатото, да откриваат што би сакале да прават, да творат, да се дружат, што е само мал сегмент од глобалното сценарио за спас на човештвото. Креативниот центар Карпош е успешна синтеза на детските љубопитност и инвентивност со ентузијазмот на многу наставници и други професионалци што со љубов ги споделуваат своите искуство и знаење. Со тоа стана корисна алатка за унапредување на образованието во Општина Карпош, преку работа со заинтересираните и талентирани деца во различни области од науката, техниката, уметноста и другите видови творештво – истакна Поповски.