Дени Милевски, нов директор на ЈКП „Гази Баба 2007“

Нов директор на ЈКП „Гази Баба  2007“ е Дени Милевски. Градоначалникот на Општина Гази Баба, Бобан Стефковски, одржа работен и конструктивен состанок со новиот директор.

Од Општина Гази Баба соопштија дека на состанокот тој му ги пренел клучните приоритети, задолженија и насоки за поефикасно работење на претпријатието, со цел понатамошно унапредување на услугите што ги добиваат нашите граѓани.

– Комуналната хигиена претставува основа за здраво, уредно и за функционално општество. Чистите улици и уредените јавни површини се предуслов за квалитетно живеење.  Затоа, акцент ставаме на зголемена фреквенција на чистење по улиците и месните заедници, подобрување и набавка на механизација, како и на алат за изработка на урбана опрема. Во исто време, водоснабдувањето во руралниот дел на општината е стратешки предизвик и приоритет. Заедно со новото раководство ќе работиме на стабилно и на квалитетно водоснабдување во сите рурални населени места, навремена санација на дефекти и замена на застарени делови од мрежата, но и на долгорочни решенија што ќе обезбедат сигурна вода за сите жители, без разлика на локацијата – истакна Стефковски.

Тој му се заблагодари на досегашниот директор на ЈКП „Гази Баба 2007“, Игор Атанасовски, за соработката, за реализираните проекти и за големиот број активности кои оставија резултати во општината.

⠀