Регулаторната комисија за енергетика, водни услуги и услуги за управување со комунален отпад (РКЕ) донесе одлука за зголемување на цените на нафтените деривати, што од полноќ ќе поскапат за 1,5 до два денари по литар. Со ова поскапување, просечното зголемување на малопродажните цени изнесува 2,46 отсто.
Бензините еуросупер БС-95 и БС-98 и екстра лесното масло за домаќинство (ЕЛ-1) ќе поскапе за 1,50 денари, додека еуродизел (Д-Е В) ќе се продава за два денари повеќе по литар. Новите малопродажни цени изнесуваат: еуросупер БС-95 – 72 денари, еуросупер БС-98 – 74 денари, еуродизел – 66,5 денари, а екстра лесното масло – 66 денари по литар. Цената на мазутот М-1 НС ќе се зголеми за 0,854 денари по килограм и изнесува 32,987 денари.
Од РКЕ посочуваат дека поскапувањето е резултат на зголемените референтни цени на светскиот пазар: бензините поскапеа во просек за 4,109 %, дизелот за 5,194 %, екстра лесното масло за 4,462 %, а мазутот за 3,846 %. Курсот на денарот во однос на доларот е повисок за 0,2303 %, што делумно влијаело на формирањето на новите цени.
