Демократите во САД објавија нова серија фотографии поврзани со Епстин, патни документи и понуда за „продажба“ на девојки

Демократите во Комитетот за надзор на Претставничкиот дом на САД објавија нова серија фотографии поврзани со осудениот сексуален престапник Џефри Епстин, вклучувајќи патни документи и лични документи од повеќе земји, како и снимки од пораки во кои се споменува 18-годишник од Русија и наводна понуда од „1.000 долари по девојка“, пренесе „Танјуг“.

Меѓу објавените материјали е фотографија од пасош на украински државјанин, со затемнети лични информации, како и снимка од екранот од преписка од непознат испраќач, според американскиот „Си-би-ес њуз“.

Пораките даваат информации за лицето, вклучувајќи име, возраст, телесни мерки, тежина и „град на поаѓање“, при што се споменува Русија, но личните информации се редигирани.

Објавата, исто така, вклучува фотографии од разни патни и идентификациски документи од странство, вклучувајќи пасоши од Литванија, Украина, Чешка и Русија, со затемнети податоци, како и јужноафриканска лична карта и италијанска возачка дозвола.

Меѓу другото, објавена е и фотографија од американскиот пасош на Епстин.

Некои од фотографиите прикажуваат цитати од романот „Лолита“ на Владимир Набоков напишани на различни делови од телото на жена.

Сликите прикажуваат делови од текстот напишан на нејзините гради, стапала, колкови, врат и по должината на ‘рбетот, додека последната реченица од пасусот не е прикажана.

Познато е дека Епстин чувал прво издание на „Лолита“, роман за опсесијата и сексуалната злоупотреба на 12-годишно девојче, во канцеларијата на својот дом во Њујорк.

Меѓу документите е и редактираниот руски пасош, за кој се вели дека ѝ припаѓа на жена, додека други информации се блокирани.

Демократскиот претседател на Надзорниот комитет, конгресменот Роберт Гарсија, рече дека демократите ќе продолжат да објавуваат фотографии и документи од имотот на Епштајн „за да обезбедат транспарентност за американската јавност“.

Тој рече дека како што се приближува рокот за Законот за транспарентност на досиејата на Епстин, новите слики отвораат дополнителни прашања за тоа што има Министерството за правда и побара документите веднаш да бидат објавени.

Владата на САД има рок до утре да ги сподели сите материјали поврзани со Епшстин што ги има.

На 12 декември, демократските членови на Комитетот за надзор на Претставничкиот дом објавија нови фотографии, за кои велат дека доаѓаат од имотот на Епштајн, на кои се прикажани голем број моќни и јавни личности поврзани со покојниот финансиер, вклучувајќи го американскиот претседател Доналд Трамп, поранешниот претседател Бил Клинтон и основачот на Мајкрософт, Бил Гејтс.

Објавени се вкупно 19 фотографии, а на фотографиите се појавуваат и британскиот милијардер Ричард Бренсон, поранешниот принц Ендру, како и поранешниот претседател на Харвард, Лари Самерс и адвокатот Алан Дершовиц, објави Си-Ен-Ен.

Иако многу од споменатите лица со години ги познавале или документирале врските со Епштајн, новиот материјал сугерира поширок опсег на тие контакти.

На една фотографија е прикажана чинија со кондоми со карикатура од лицето на Трамп и натпис „Трамп кондоми – 4,50 долари“.

На друга е прикажан Трамп како позира со шест жени чии лица се редигирани.

На други фотографии е прикажан поранешниот советник на Трамп, Стив Банон, со Епштајн, Клинтон со Епштајн и неговата партнерка Џилијан Максвел, и Гејтс со Ендру.

Ниедна од објавените фотографии не прикажува сексуално вознемирување или малолетници, и не е познато кога или каде се направени, соопшти комитетот.

Фотографиите се дел од поширока истрага на Републиканскиот надзорен комитет, кој досега добил десетици илјади документи, е-пошта и материјали од имотот на Епштајн.

Според адвокатите на имотот, досиејата може да содржат елементи чија точност имотот не можел да ја потврди, а редакциите се ограничени на фотографии со несоодветна содржина.

Демократскиот конгресмен Роберт Гарсија рече дека најновиот сет вклучува „повеќе од 95.000 фотографии“, вклучувајќи слики од бројни јавни личности кои поминале време со Епштајн.

Тој го повика Министерството за правда да ги објави сите досиеја.

Клинтон, Гејтс и Трамп претходно негираа какво било кривично дело во врска со Епшстин.

Портпаролот на Клинтон рече дека поранешниот претседател немал сознанија за злосторствата на Епстин и ги прекинал сите контакти пред неговото апсење во 2019 година.

Портпаролот на Гејтс повтори дека Епштајн не работел за него, додека Гејтс рече дека жали за средбите.

Трамп и неговиот тим ги отфрлија инсинуациите по објавувањето на е-поштата на Епштајн во која финансиерот тврдеше дека Трамп „знаел за девојките“, нарекувајќи го материјалот „измама“.