Од Општина Кисела Вода ги повикуваат дечињата што сакаат да бидат дел од манифестацијата „Бадникови поворки 2026“ да го пријават своето учество кај Дарко Петровски на 078/383-746 и кај Маријана Блажевска на 070/285-343.
Воедно, канат и на бадниковата работилница, која ќе се одржи в сабота, од 10:00 часот, во спортската сала во ООУ „Невена Георгиева-Дуња“, во чии рамки ќе се изработуваат ѕвездички, а децата ќе се дружат и ќе ја учат песната „Вечниот Бог“, подготвувајќи се за најубавото празнично доживување.
Работилницата е отворена за сите дечиња.
И дечињата од Аеродром со радост се подготвуваат за „Бадниковите поворки“, кои ќе се одржат под слоганот „Со божиќната радост, срца да стоплиме!“
– Општина Аеродром, како дел од оваа традиционална манифестација, ги поддржува и охрабрува најмладите да ги негуваат празничната магија и заедништвото. Со своите мали, вредни раце, тие изработуваат блескави ѕвездички – симбол на љубовта, детската радост и на искрените желби. Со секоја ѕвездичка се пренесуваат насмевка и топла порака, а децата се срцето на „Бадниковите поворки“ и најубав симбол на Божиќ – потенцираат од Општина Аеродром.
