Градоначалникот на Општина Центар, Горан Герасимовски, ги поканува сите деца од Скопје, заедно со своите родители, да се приклучат на спортската дружба и забава со познатиот македонски атлетичар, Кокан Ајановски.
Настанот ќе се одржи в среда, со почеток во 19:00 часот, кај скалите под хотелот „Парк“ на кејот на Вардар и е во рамките на проектот „На одмор сум, во Центар сум“.
Дечињата ќе имаат можност да трчаат заедно со Кокан, да научат повеќе за атлетиката и да уживаат во позитивната енергија на спортот.
Герасимовски истакнува дека со овие активности, на децата што летово остануваат во градот им се нуди можност за дружење, забава и за нови спортски искуства.
– Верувам дека ваквите спортски дружби се најдобриот начин децата да го поминат летото активно и креативно. Нашата цел е да им создадеме моменти што ќе ги паметат, но и да ги поттикнеме да го засакаат спортот како дел од секојдневието. Спортот не само што го зајакнува телото туку гради и тимски дух, дисциплина и самодоверба, која е важна за развојот на децата. Ве чекаме в среда, на кејот на Вардар – вели Герасимовски.
Настанот „На одмор сум, во Центар сум“ се реализира во рамките на Програмата за култура на Општина Центар за 2025 година. Целта е да се збогатат спортските, рекреативните и културните содржини за учениците што не заминале на летен одмор.
