Даночната управа апелира да не се чека последниот ден за поднесување на ДДВ пријава

Управата за јавни приходи извести дека и во понеделник (27 октомври) ќе можат даночните обврзници да поднесат пријава за ДДВ.

– Законскиот рок за поднесување и плаќање на ДДВ-04 пријавите е 25 октомври (сабота), а бидејќи е неработен ден, истиот се поместува за првиот нареден работен ден – понеделник, 27 октомври 2025 година. Апелираме даночните обврзници обврските да ги исполнат навремено и да не го чекаат последниот ден од законски утврдениот рок, со цел да се избегне преоптоварување на системот и можни технички пречки во последен момент – информираат од УЈП.

Во овој период се поднесуваат месечни и тримесечни ДДВ-04 пријави.

– Важно е да се напомни дека поднесувањето на пријавата без истовремено плаќање на долгот не ги исполнува законските обврски. Само со целосно точно и навремено поднесување на пријавата и плаќање на обврските, се избегнуваат дополнителни камати, санкции и непотребен стрес – велат од УЈП.