Данела Арсовска и вработени во Град Скопје нападнати во Чаир – завршија на ургентен 

Градоначалничката на град Скопје, Данела Арсовска која заедно со вработени во Град Скопје денеска на пладне биле на увид на дивоградба во Чаир, биле физички нападнати и завршија во Ургентниот центар „8-ми Септември“. Градоначалничката побарала лекарска помош по инцидентот на улица „Кумбара“, случајот го пријавил сведок. Од МВР потврдија дека скопската градоначалничка била нападната додека извршувала службени обврски на територија на Општина Чаир, а дека инцидентот го пријавило лицето со иницијали А.Ј., а не самата Арсовска.

Не се познати причините зошто Арсовска била нападната, но инцидентот следува откако изминативе недели градоначалничката јавно говореше дека добива закани поради најавите за кривични пријави против градоначалникот на Чаир, Висар Ганиу

Градоначалничката на град Скопје, Данела Арсовска која заедно со вработени во Град Скопје денеска на пладне беа на увид на дивоградба во Чаир, биле физички нападнати и завршија во Ургентниот центар „8-ми Септември“. Градоначалничката побарала лекарска помош по инцидентот на улица „Кумбара“, случајот го пријавил сведок.

Од МВР потврдија дека скопската градоначалничка била нападната додека извршувала службени обврски на територија на Општина Чаир, а дека инцидентот го пријавило лицето со иницијали А.Ј., а не самата Арсовска.

– На 11.07.2025 во 12:15 часот, во СВР Скопје од страна на А.Ј. е пријавено дека при извршување работни задачи на улицата „Кумбара“ физички била нападната градоначалничката на Град Скопје, Данела Арсовска, и дека повеќе лица ѝ упатувале вербални закани. Истата не сакала да поднесе пријава за настанот, по што се упатила во ГОБ „8-ми Септември“ за укажување лекарска помош – информираа од полицијата.

Не се познати причините зошто Арсовска била нападната, но инцидентот следува откако изминативе недели градоначалничката јавно говореше дека добива закани поради најавите за кривични пријави против градоначалникот на Чаир, Висар Ганиу.

Пред да се случи инцидентот во Чаир, Арсовска преку нејзиниот Фејсбук профил обвини дека Министерството за внатрешни работи одбило да ги прими пријавите за физички напад врз советничката во Град Скопје, Ирена Витина што се случи пред три дена. Во објавата, Арсовска вели дека нападот бил од полициски службеник кој, како што тврди таа, бил фател при „незаконско приклучување на водоводната мрежа“ на ЈП „Водовод и канализација“.

– Уште еден ден во Македонија. Само да знаете каде живеете. МВР одбиваше да ги прими пријавите од Град Скопје за физички напад од негов службеник врз жена, под изговор дека морало да има придружен документ со кој ви ја доставуваме пријавата за физички и вербален напад од страна на ваш полициски службеник. Ве повикуваме итно и неодложно да постапите по овие поднесоци – се вели во поднесокот на Арсовска до МВР.

Според тврдењата на градоначалничката, засега ниту една институција не изразила осуда за инцидентот, но од МВР тврдат дека Одделот за внатрешна контрола, криминалистички истраги и професионални стандарди презема мерки за расчистување на случајот.

Арсовска деновиве посочуваше дека секој ден се откриваат по 30 диви приклучоци на градската водоводна мрежа.

– Истите ни денар не плаќаат и затоа нерационално трошат бидејќи ја добиваат водата за џабе, а МВР не постапува. Не може да си наводнуваат ниви, да користат вода за дивоградбите и за полнење на базените со основниот природен ресурс – водата за пиење. Затоа потрошувачката е енормна по глава на жител – вели Арсовска.