Претседателот на УФЦ, Дана Вајт, конечно проговори за скандалот со наместените натпревари што ја засени промоцијата во текот на изминатата недела. Борбата во перо категоријата помеѓу Исак Дулгаријан и Јадиер дел Вале, одржана во УФЦ Вегас 110 минатата сабота, беше во центарот на контроверзиите поради сомнителното плаќање за обложување, направено непосредно пред борбата.
Иако Дулгаријан влезе во борбата како фаворит, само неколку часа пред неа, шансите драматично му се намалија откако беа ставени големи суми пари на Дел Вале, за победа во првата рунда. Необичната активност ја пријави IC360, компанија за следење на обложување со која соработува УФЦ, а Дулгаријан беше отпуштен од промоцијата.
УФЦ веднаш издаде соопштение во кое ветува темелна истрага, а сега и самиот Вајт проговори за ова прашање. Во разговор за „ТМЗ Спорт“, тој детално објасни како дознале за потенцијалниот проблем.
- Веројатно, околу еден часот тој ден, бевме со компанијата IC360, и таа е најдобрата компанија за следење на обложувањето. Тие нè контактираа и ни кажаа дека има некаква необична активност во врска со таа борба. Ги повикавме борачот и неговиот адвокат и ги прашавме: „Што се случува? Има некаква чудна активност во обложувањето со твојата борба, дали си повреден? Дали му должиш пари некому? Дали некој ти се обрати за да ја наместиш борбата?“ А детето рече: „Не, апсолутно не, ќе го убијам тој човек“.
И покрај негирањата на Дулгаријан, борбата заврши точно како што предвидувало сомнителното плаќање: со победа на Дел Вале, со давење во првата рунда. Реакцијата на УФЦ беше моментална.
- Па рековме, во ред. Борбата продолжува, првата рунда заврши со давење одзади. Буквално првото нешто што го направивме беше да се јавиме во ФБИ. Па го повикавме ФБИ. Се сретнав со ФБИ двапати денес – продолжи Вајт, истакнувајќи го својот добар однос со директорот на ФБИ, Кеш Пател.
Вајт ја искористи можноста да испрати порака до секој што би помислил да намести борба.
- Ако се обидете да го направите ова (бев многу гласен околу ова прашање), ние ќе бидеме ваш најголем непријател. Ќе ве нападнеме веднаш со целосна сила, со ФБИ и со кој било друг што треба да се вклучи и ќе направиме сè што може за да ве ставиме во затвор – порача Вајт.
Откако избувна скандалот, неколкумина поранешни и сегашни борачи на УФЦ излегоа, тврдејќи дека во минатото им било понудено мито за местење натпревари. Вајт немаше убави зборови за нивната задоцнета искреност.
- Борачите излегуваат и велат: „О, навистина дојдоа и кај мене. Зошто не ни кажавте тогаш?“ Или поважно: „Зошто не им кажавте на органите за спроведување на законот?“ Сега велите дека дошле кај вас? Навистина е чудно што излегуваат борачите сега, велејќи дека им се обратиле. Сега ФБИ ќе дојде кај нив – посочи првиот човек на УФЦ.
