Дали Русија го добива Донбас на „лизинг“?

Според британскиот весник „Телеграф“, новиот американски мировен план од 28 точки за Украина наводно вклучува одредба според која на Москва би ѝ била дадена контрола врз источен Донбас врз основа на закуп или лизинг во замена за „надомест за заем“. Во исто време, Киев би го задржал законското сопствеништво на териториите, велат изворите, а објави и „Киев пост“.

Планот од 28 точки наводно бил разработен меѓу САД и Русија во неодамнешна серија тајни разговори, повторно разгорувајќи ги стравувањата дека Украина е изоставена од дискусиите за нејзината иднина. Планот, наводно развиен во текот на тридневните разговори од страна на американските и руските претседателски претставници Стив Виткоф и Кирил Дмитриев, повикува украинските сили да се повлечат од преостанатите неокупирани области на Донбас, претворајќи го во „демилитаризирана зона“, објави „Аксиос“ во средата.

За возврат, Москва би можела да направи територијални отстапки во делумно окупираните украински региони Запорожје и Херсон. Според планот, Киев би морал да ги намали (речиси преполови) своите вооружени сили, да престане да прима дел од западното оружје и да се откаже од стационирањето странски сили на своја територија, објави „Фајненшл тајмс“. Исто така, би му било забрането да поседува ракети со долг дострел и би морал да спречи слетување на странски дипломатски авиони во Украина, објави „Телеграф“.

Рускиот јазик би станал официјален државен јазик, а Руската православна црква би добила официјален статус на окупираните територии. На Украина би ѝ било дозволено да преговара за безбедносни гаранции со владите на САД и Европа за да помогне во одржувањето на какво примирје.

Идејата за „кирија“ и плаќање „кирија“ го одразува деловниот пристап на Доналд Трамп кон меѓународните односи, според пишувањето на „Телеграф“. Москва во суштина би платила „данок на земја“ за да ја компензира Украина за загубите од богатиот со минерали регион Донбас, објави „Киев пост“.