Црвена звезда ја донесе најдобрата ракометарка во светот

Норвешката ракометна голманка Катрин Лунде (45), која воедно е и најодликувана ракометарка во историјата, потпиша за ЖРК Црвена звезда до крајот на годината, а српските медиуми тоа го нарекуваат најголемата трансфер-бомба во женскиот ракомет во Србија.

„Навистина се радувам повторно да почнам со тренинзи и натпревари. Ќе биде возбудливо во овој нов тим“, изјави таа за норвешките медиуми пред да замине за Србија.

Црвена звезда ја донесе 45-годишната норвешка икона само три месеци откако таа играше во финалето на Лигата на шампионите со Одензе. Договорот беше потпишан до крајот на 2025 година, со договор Лунде да патува помеѓу Кристијаншанд и Белград, бидејќи нејзиниот партнер Никола Трајковиќ и ќерката Атина ќе останат во Норвешка.

Доведувањето на Лунде е дел од поширок проект на Црвена звезда, двократниот шампион на Србија, со кој клубот сака да направи медиумски и натпреварувачки пробив, вклучително и лов на групната фаза од Лигата на Европа. На овој план, Лунде е профилирана како фактор на разлика во квалификациите, со потенцијални дополнителни засилувања што клубот ги разгледува на есен.

Лунде е седумкратен европски клупски шампион, со титули со Виборг, Ѓер и Вајперс, а на репрезентативно ниво освои три златни олимписки медали, две светски и седум европски титули и бројни индивидуални награди, вклучувајќи ја и наградата за најкорисен играч на Олимписките игри во Париз.

Таа настапи на 24 големи натпреварувања со норвешката репрезентација и освои дури 20 медали. Нејзината колекција на трофеи и статусот како рекордер во Лигата на шампионите ја прават жива легенда што Црвена звезда успеа да ја доведе до крајот на нејзината кариера.