„Црвена јабука“ со старите хитови донесе емотивно патување низ времето; Јубилеен концерт во Скопје [Фото]

Сараевската група „Црвена јабука“, вчеравечер, приреди одличен концерт за бројната скопска публика дојдена во арената „Борис Трајковски“ која ја крена на нозе и ја потсети на едни поинакви времиња.

На концертот беше дојдена публика која растеше со песните на овој бенд, во 80-тите и 90-тите години на минатиот век во поранешна Југославија.

Најголемите хитови на „Црвена јабука“ меѓу кои „Дирлија“, „Туго, несречо“, „Има нешто од срца до срца“… се пееја заедно со присутните и донесоа емотивно патување назад во времето.

Фронтменот Дражен Жериќ- Жера на концертот им оддаде почит и на големите балкански музичари Масимо Савиќ, Кемал Монтено, Аки Рахимовски, кои веќе не се меѓу нас…

На задоволство на македонската публика, бендот во рок-верзија ја исполни и познатата песна на Јонче Христовски „Ако умрам ил загинам“.

Бендот во Скопје настапи во чест на 40-годишниот јубилеј, кој ќе го одбележи и во Загреб, Сараево, Љубљана, Минхен, Стокхолм…

„Црвена јабука“ е основана во Сараево во 1985 од вокалот, автор и гитарист Дражен Ричл-Зијо и од гитаристот и автор на повеќето хитови на групата, Златко Арсланагиќ-Злаја. Групата беше дел од музичкото движење нов примитивизам во 1980-тите. Првиот албум насловен „Црвена јабука“ е снимен во 1986.

Фото: П. Стојановски