Цивилната одбрана на Појасот Газа соопшти дека 22 лица се убиени во израелско гранатирање низ целата територија, додека израелските власти соопштија дека ги таргетирале членовите на палестинското движење „Хамас“ поради напаѓање на израелски војници и кршење на прекинот на огнот.
Во израелските напади загинаа 12 лица во градот Газа, вклучувајќи една брачна двојка и нивните три деца, објави Цивилната одбрана, организација за прва помош што работи под власта на „Хамас“, пренесе „Бета“.
Нејзиниот портпарол, Махмуд Басал, се појави во видео на кое се прикажани телата на три мали деца завиткани во чаршафи.
Басал, исто така, објави 10 смртни случаи во областа Кан Јунис (јужен Појас Газа), вклучувајќи две малолетни лица чии возрасти не ги прецизираше.
Израелската војска претходно денес обвини „неколку терористи дека отвориле оган во текот на денот во насока на област каде што нејзините војници дејствуваат во Кан Јунис“.
Нападите не предизвикаа жртви или повредени, но претставуваа „кршење на договорот за прекин на огнот“, се вели во соопштението на израелската армија, додавајќи дека дејствувала како одговор на „нападите врз терористичките цели на Хамас низ Појасот Газа“.
Со оглед на ограничувањата наметнати врз медиумите во Газа и тешкотиите за пристап до областа, „АФП“ не беше во можност независно да ги потврди информациите од различните страни.
Крвко прекин на огнот, веќе обележано со неколку избувнувања на насилство, е во сила во Појасот Газа од 10 октомври, според договор постигнат со посредство на САД.
Во првата фаза, договорот овозможи враќање на последните 20 живи заложници од нападот на 7 октомври кои беа во Газа, во замена за ослободување на неколку стотици палестински затвореници и враќање на 25 тела на мртви заложници, од 28 што Хамас вети дека ќе ги предаде.
Израел бара нивно враќање, обвинувајќи го исламистичкото движење за застој на процесот, наведувајќи ја тешкотијата за нивно лоцирање на територија уништена од двегодишна војна.
Имплементацијата на втората фаза од планот на американскиот претседател Доналд Трамп за Газа сè уште не е одобрена.
Таа фаза особено вклучува разоружување на Хамас, воспоставување преодна власт и распоредување на меѓународни стабилизациски сили.
Војната беше предизвикана од нападот на „Хамас“ врз Израел на 7 октомври 2023 година, во кој загинаа 1.221 лице.
Повеќе од 69.500 луѓе се убиени во израелски напади, според бројките од Министерството за здравство на територијата контролирана од Хамас, која ОН ја смета за сигурна.
