Поранешниот грчки премиер Алексис Ципрас вчера поднесе оставка од функцијата пратеник на Сириза во грчкиот парламент, наведувајќи дека тоа е „одлука на совеста“ и дека се враќа на општествено дејствување, „далеку од политички позиции и партиски механизми“.
Грчките медиуми шпекулираат дека потегот на поранешниот премиер е првиот чекор кон формирање нова партија која има за цел да ја предводи грчката левица.
„Се повлекувам од функцијата пратеник на Сириза, но не се повлекувам од политичкиот активизам. Не можам и не сакам формално да учествувам во парламент кој, лишен од својата демократска суштина, не е во можност да ја исполни својата уставна улога и барањата на своите граѓани“, рече тој во писмо до претседателот на парламентот Никитас Какламанис, откако го информираше лидерот на партијата Сириза, Сократис Фамел, објави грчкиот јавен радиодифузен сервис ЕРТ.
Тој изјави дека по 16 години во парламентот, како пратеник, лидер на партија, лидер на опозиција и премиер, одлучил да се повлече од политичката функција бидејќи смета дека неговиот настап во парламентот, како поранешен премиер, не им носи ништо суштинско на оние што го избрале.
Ципрас нагласи дека се повлекува од парламентот, но дека не „ја напушта политичката борба“ и се враќа на „неизвесната сигурност“ на општественото дејствување, со цел да биде поблиску до потребите на општеството.
Тој ја истакна потребата од колективна борба за социјална правда. „Актуелните проблеми во Грција, економски, политички, геостратешки и морални, се предизвици што бараат промени и создавање надеж преку дејствување, а не само преку зборови“, рече Ципрас.
Тој ги повика поранешните соборци да не станат негови противници, туку „повторно да се поврзат во заедничката работа за општествени промени“.
Тој, исто така, апелираше до граѓаните кои се незадоволни од моменталната состојба на работите да се вклучат во промените и да преземат одговорност за иднината на земјата. Ципрас имаше 34 години кога стана лидер на Сириза пред 17 години и го надгледуваше нејзиниот изборен скок од 4,6 проценти во 2009 година на 36,3 проценти во 2015 година.
Тој беше премиер на Грција од 2015 до 2019 година, за време на некои од најтурбулентните години од финансиската криза во земјата. Во летото 2023 година, Ципрас поднесе оставка од функцијата лидер на партијата по тешкиот пораз на националните избори од владејачката партија Нова демократија од десниот центар. Оттогаш, Сириза се соочува со егзистенцијална криза, што доведе до многу поделби и го изгуби статусот на главна опозициска партија во земјата. Анкетите покажуваат дека потенцијалната база на Ципрас би можела да опфати до 20 проценти од електоратот, пред следните избори во 2027 година.
