Цените на златото повторно пораснаа за два отсто – 4.430 долари за унца

Цените на златото денес повторно пораснаа за два проценти, првенствено поради зголемените геополитички тензии, достигнувајќи 4.430 долари за унца.

Вредноста на скапоцениот метал скокна откако САД го заробија венецуелскиот претседател Николас Мадуро, што ги насочи инвеститорите кон побезбедни инвестиции, објави „Трејдинг економикс“.

Американскиот претседател Доналд Трамп изјави дека САД привремено ќе „управуваат“ со Венецуела откако го соборија Мадуро во ненадејна воена операција во саботата.

Државниот секретар на САД, Марко Рубио, се обиде да го ублажи ударот во неделата, велејќи дека Вашингтон ќе се залага за промени, но нема директно да управува со земјата.

Во меѓувреме, инвеститорите внимателно ги следат и клучните економски податоци на САД, особено извештајот за работни места што треба да биде објавен во петок, кој би можел да понуди повеќе индиции за идниот пат на каматните стапки во САД.

Златото ја заврши годината со најсилен годишен раст од 1979 година, поттикнат од силната побарувачка за инвестиции, монетарното олеснување на САД и зголемените купувања од централните банки.