Според трговците и финансиските аналитичари, се очекува да продолжи навидум незапирливиот пораст на цените на златото во втората половина од годината. Во својата најнова прогноза, Светскиот совет за злато (WGC) предвидува дека цените ќе продолжат да растат, иако со малку побавно темпо.
Цената на златото се искачи на нешто над 3.300 долари за унца (31,1 грам), што е речиси двојно повеќе од нивото во 2022 година. „Голдман Сакс“ предвидува дека би можел да достигне 4.000 долари до средината на 2026 година.
Аналитичарите го посочуваат континуираното купување од централните банки, особено Кина, како клучен двигател на овој раст, бидејќи земјите се стремат да ја намалат својата зависност од американскиот долар.
– Додека централните банки продолжуваат да акумулираат резерви на злато, цените ќе продолжат да се движат нагоре – вели Михаел Еубел, раководител на трговијата со скапоцени метали во „BayernLB“, еден од водечките германски трговци со злато.
– Централните банки купуваат околу 1.000 тони злато годишно во последните години. Значителен дел од ова, веројатно, може да ѝ се припише на Кина – додава Бенџамин Сума, портпарол на трговецот со злато „Pro Aurum“ со седиште во Минхен.
Податоците од Светскиот совет за злато покажуваат дека Кина ги зголемила своите резерви на злато речиси шест пати од 2000 година, од 395 тони на 2.292 тони до крајот на првиот квартал од 2025 година. Тоа ја става на седмото место во светот. Но, многу експерти веруваат дека реалните резерви на Пекинг се многу поголеми.
Но, Кина во никој случај не е единствената земја што купува злато. Земјите што сакаат да ја намалат својата зависност од американскиот долар и сè повеќе се свртуваат кон физичкото злато се Индија, Обединетите Арапски Емирати и Катар.
Сепак, оваа година најактивен купувач не е Кина, туку Полска, која купила повеќе од 48 тони досега во 2025 година, според WGC, ставајќи ја на врвот од листата. Русија беше најголемиот официјален купувач на злато со години, но го намали своето купување од 2020 година, според официјалните податоци.
