Цела Италија зборува за тоа што Ибра му го направи на Модриќ

Второпласираниот Милан, претрпе неочекуван пораз од Парма на „Сан Сиро“ во рамките на 26-то коло од италијанската Серија А, а главна тема на медиумите на Апенините е потегот на Златан Ибрахимовиќ кон Лука Модриќ.

„Росонерите“ беа апсолутни фаворити пред натпреварот и се очекуваше Милан да забележи уште една победа и да ја продолжи борбата со лидерот Интер.

По киксот против Комо, Милан беше целосно разочаран против Парма, која направи огромно изненадување и оствари победа. Поради ова, Милан сега има десет бода помалку од Интер и борбата за „Скудетото“ се чини дека се ближи кон крајот.

Сосема очекувано, фудбалерите на Милан добија остри критики, а за прв пат оваа сезона, Лука Модриќ некако потфрли.

Искусниот Хрват е импресивен во дресот на Милан откако пристигна од Реал (М) и, и покрај тоа што има 40 години, игра во неверојатна форма, но не беше на своето вообичаено ниво против Парма.

Сепак, медиумите во Италија пишуваат дека ова се должи на фактот што Модриќ во последно време е под зголемен притисок од челниците на клубот, кои сакаат што е можно поскоро да донесе одлука во врска со договорот што истекува ова лето.

Милан сака да го задржи Модриќ по неговите одлични настапи оваа сезона, но хрватскиот играч од средниот ред не сака премногу да брза со новиот договор што му го нудат „росонерите“, а тоа не му се допаѓа на Златан Ибрахимовиќ.

„Ла Газета дело Спорт“ пишува дека Ибрахимовиќ имал разговор со Модриќ и дека му дал ултиматум на Хрватот во врска со договорот, и дека сакаат што поскоро да донесе одлука за да знаат каде се наоѓаат.

Милан има опција еднострано да ја активира клаузулата за продолжување на договорот за уште една година, но Ибрахимовиќ не сака да го стори тоа сè додека Модриќ не даде согласност.

Првичниот план на Модриќ бил да почека до крајот на сезоната и да донесе одлука по Светското првенство, но очигледно е дека Милан не може да чека толку долго.

Досега оваа сезона, Модриќ одигра 28 натпревари за Милан во сите натпреварувања, постигнувајќи два гола и имајќи три асистенции.