Светот беше шокиран по падот на авионот на „Ер Индија“, во кој загинаа најмалку 241 лице. Но, во оваа трагедија имаше и неверојатна приказна што го привлече вниманието на светските медиуми. Станува збор за единствениот преживеан патник и, како што објавуваат многу медиуми, за таканареченото „чудо од седиште 11А“.
Се чинеше невозможно, но не долго откако беше објавена веста за падот на авионот на „Ер Индија“, на социјалните мрежи се појавија видеа од човек кој оди на местото на несреќата во крвава гардероба.
Се покажа дека еден патник преживеал, британски државјанин од индиско потекло, идентификуван од „Хиндустан тајмс“ како Вишвас Кумар Рамеш, објави „Си-Ен-Ен“.
- Триесет секунди по полетувањето, се слушна гласен шум, а потоа авионот се урна. Сè се случи многу брзо, рече тој во интервју во болницата каде што беше хоспитализиран.
Тој рече дека бил во Индија за да го посети семејството и се враќал во Велика Британија со својот брат, кој седел во вториот ред. Не знаел дали неговиот брат преживеал.
„Ер Индија“ подоцна потврди дека 241 од 242 лица во авионот загинале. Ова значеше дека Рамеш бил единствениот преживеан.
