Димитри Медведев, поранешен руски претседател и премиер, а денес заменик-претседател на рускиот Совет за безбедност, реагираше на изјавите на украинскиот претседател Володимир Зеленски за неможноста да се гарантира безбедноста на светските лидери кои ќе дојдат во Москва на 9 мај.
Во објава на социјалните мрежи, Медведев му се закани на Киев во случај на „провокација“ на Денот на победата, кога ќе се одржи воена парада во Москва.
„Овој ѓубре разбира дека, во случај на вистинска провокација на Денот на победата, никој не гарантира дека Киев ќе го види 10 мај“, напиша Медведев.
Изјавата доаѓа откако Зеленски, во интервју за новинарите на АФП, рече дека Украина не може да преземе одговорност за безбедноста на странските лидери кои ќе пристигнат во Москва на 9 мај.
„Ја почитуваме одлуката на оние лидери кои планираат да присуствуваат на парадата на Путин, но Украина нема одговорност за она што може да се случи на територијата на Руската Федерација. Тие се задолжени за вашата безбедност и затоа нема да дадеме никакви гаранции. Затоа што не знаеме што би можела Русија да направи на тие датуми. Може, на пример, да изврши различни акции од своја страна – да предизвика пожари, да предизвика експлозии.
Да потсетиме, рускиот претседател Владимир Путин предложи тридневен прекин на огнот од 8 до 10 мај по повод Денот на победата, за да се обезбеди непречено славење на воената парада во Москва. Предлогот беше испратен и до украинската страна, но Киев го одби.
Зеленски во средата веќе изјави дека Украина е за итен, целосен и безусловен прекин на огнот, но не за симболичен и привремен, туку за примирје што ќе трае најмалку 30 дена.
„Путин сака молк за неговата парада. Но, времето за запирање на војната е сега, а не 8 мај“, рече тогаш украинскиот претседател.
