Четворица убиени, 8 повредени во напад врз мормонска црква: „Уште еден целен напад врз христијаните во САД“

Најмалку четири лица се убиени, а осум други се повредени по масовно пукање и пожар во мормонска црква во Мичиген, соопшти полицијата. Градоначалникот на Гранд Блан, Вилијам Рејние, на прес-конференција изјави дека осомничениот бил убиен од полицајци и дека двајца од повредените се во критична состојба.

Тој додаде дека осомничениот е 40-годишен маж од Бартон, кој со своето возило влегол во црквата и почнал да пука кон стотици луѓе кои присуствувале на неделната служба.

„Осомничениот употребил автоматска пушка и намерно го подметнал пожарот“, рече Рејние, додавајќи дека полицијата верува дека ќе пронајде повеќе жртви во пожарот, пренесува Фокс њуз.

Истражителите го идентификувале мажот како Томас Џејкоб Санфорд, 40-годишник од блискиот град Бартон, објави Си-Ен-Ен.

Полициски извор запознаен со истрагата изјавил дека потрагата во е завршена во ноќта, а седум лица сè уште се водат како исчезнати.

Инцидентот се случил околу 11 часот по локално време во Црквата на Исус Христос во Гранд Блан, околу 80 километри северно од Детроит.

Полициската управа на Гранд Блан ја повика јавноста да ја избегнува областа.

Шерифот на округот Џенеси, Кристофер Свансон, изјави дека „целата црква гори“ и потврди дека луѓето во црквата се евакуирани.

A deranged gunman bursts into the Church of Jesus Christ of Latter-day Saints in Grand Blanc during Sunday services, unleashing bullets on innocent worshippers before setting the building ablaze in a cowardly act of pure evil. pic.twitter.com/k5QKJBxlT8

— Public Exposer (@sc_exposer) September 28, 2025

Околу 20 минути подоцна, полициската управа објави дека пожарот е локализиран.

Претседателот на САД, Доналд Трамп, на платформата Truth Social изјави дека „осомничениот е мртов, но сè уште има многу што да се открие“.

Тој рече дека ФБИ веднаш излегло на местото на настанот, започнало федерална истрага и ќе им обезбеди целосна поддршка на државните и локалните власти.

„Се чини дека ова е уште еден целен напад врз христијаните во Соединетите Американски Држави“, рече Трамп, предупредувајќи дека „оваа епидемија на насилство во Соединетите Американски Држави“ мора веднаш да заврши.

По пукањето и пожарот, полициската управа на Њујорк соопшти дека ќе распореди полицајци во религиозните институции низ градот „како мерка на претпазливост“.