Германските пратеници го одобрија контроверзниот пакет за пензиска реформа предложен од владејачката коалиција на канцеларот Фридрих Мерц по месеци политички препирки, објави новинската агенција ДПА.
Еден од трите закони наиде на отпор во рамките на парламентарната група на Мерц, Христијанско-демократската унија (CDU), при што младинското крило се закани дека ќе го отфрли од страв од идните трошоци што би можеле да достигнат милијарди евра.
Стареењето на населението на Германија значи дека бројот на работоспособни лица кои можат да ги одржат сегашните нивоа на пензии за растечкиот дел од пензионерите се намалува. Ова го зголемува финансискиот товар на социјалните бенефиции за идните генерации.
И покрај претходниот бунт на младите христијански демократи, Мерц успеа да обезбеди „канцеларско мнозинство“ во петокот – апсолутно мнозинство гласови од неговата коалиција на христијански демократи и социјалдемократи (SPD), на што му беа потребни најмалку 316 гласови за реформата.
Законот доби поддршка од 319 пратеници, 225 беа против, а 53 се воздржаа, според заменик-претседателот на Бундестагот, Бод Рамелов. На крајот, само седум христијански демократи гласаа против реформите, пренесува ДПА.
Доколку Бундесратот, или покраинскиот парламентарен совет, го одобри законот на 19 декември, тој може да стапи на сила на 1 јануари.
