Брутални руски напади од земја и од воздух: Нападнат воено-индустриски комплекс во Украина – 580 дронови лансирани само преку ноќ, има мртви

Руските вооружени сили извршија голем напад врз објекти на украинскиот воено-индустриски комплекс, вклучително и таргетирање на компании кои работат на развој на оперативно-тактичкиот ракетен систем „Сапсан“, објави руското Министерство за одбрана.

Според официјалното соопштение, нападите биле извршени со комбинација од оружје со долг дострел и прецизно водење, од воздух и од земја, како и со употреба на ударни беспилотни летала, објави РИА Новости.

Меѓу целите се производството на:

повеќенаменски ударни и извидувачки дронови
роботизирани борбени возила
дронови пресретнувачи
измамничка муниција
Во соопштението се вели дека „сите назначени цели се погодени“.

Три лица убиени во Украина
Украинскиот претседател Володимир Зеленски изјави дека во текот на ноќта, Русија извршила голем напад врз Украина, лансирајќи околу 580 дронови и 40 ракети, во кои биле убиени три лица.

Според информациите што ги сподели Зеленски преку апликацијата Телеграм, Русија нападнала украинска инфраструктура, компании за цивилно производство и станбени области во различни региони на Украина, објави Ројтерс.

„Целата ноќ беше под руски напади. Секој таков напад не е воена неопходност, туку намерна стратегија на Русија за тероризирање на цивилите и уништување на нашата инфраструктура“, рече Зеленски.