Брутален напад на Русија во Украина, има многу жртви: Погодена зградата на Владата во Киев, има/ФОТО/ВИДЕО

Во еден од најголемите ноќни напади од почетокот на војната, Русија лансираше 805 беспилотни летала и 13 ракети кон Украина, соопштија украинските воздухопловни сили во неделата. Во нападот загинаа жена и бебе во Киев, беа ранети десетици луѓе и беше запалена зградата на Кабинетот на министри – првиот потврден напад врз седиштето на украинската влада од почетокот на војната.

Во населбата Свјатошин, деветкатна зграда беше делумно уништена, помеѓу 4-тиот и 8-миот кат, во која беа убиени мајка и нејзиното дете, а 18 лица беа ранети. Уште една шеснаесеткатна зграда, два станбени блока, автомобили и магацини исто така изгореа по ударот.

Градоначалникот на Киев, Виталиј Кличко, рече дека спасувачите и лекарите работеле цела ноќ.

– Меѓу загинатите има мајка и нејзиното бебе. Ова е цената на рускиот терор – рече Кличко.

Делови од беспилотни летала и ракети ја погодија и зградата на Владата на Украина во Печерскиот округ, предизвикувајќи пожар на горните катови. Непосредно пред зори, новинар од „Киев пост“ слушнал карактеристичен звук на ракета над центарот на главниот град, проследен со силна експлозија.

Набргу потоа, како што изгреваше сонцето, густ црн чад се издигна од правецот на Врховната рада и Кабинетот на министри, недалеку од местото каде што вообичаено престојува претседателот Володимир Зеленски.

Украинската премиерка Јулија Свириденко го потврди нападот и го нарече прв напад врз владина зграда за време на целосна војна.

– Ќе ги обновиме зградите. Но, изгубените животи не можат да се вратат. Светот мора да одговори не само со зборови, туку и со дела. На Украина ѝ се потребни нови санкции против руската нафта и гас и повеќе оружје за да се запре теророт – рече таа.