Британската вицепремиерка Ангела Рејнер поднесе оставка откако истрагата откри дека платила помалку данок отколку што требало при купување стан, пренесе „Бета“.
Со тоа таа ги прекрши етичките стандарди што ги обврзуваат министрите бидејќи мораше да побара официјален даночен совет за купувањето, што не го стори.
Премиерот Кир Стармер го назначи поранешниот министер за надворешни работи Дејвид Лами за свој заменик наместо Рејнер како дел од денешната реконструкција на владата.
Извештајот сугерира дека Рејнер платила 40.000 фунти помалку данок отколку што требало кога го купила станот од 800.000 фунти (околу 1 милион долари).
Рејнер го призна ова во средата и рече дека истрагата открила дека дејствувала без да знае дека требало да побара даночен совет.
Рејнер, 45, се обиде да објасни дека нејзините „сложени услови за живеење“ произлегуваат од нејзиниот развод во 2023 година и фактот дека нејзиниот син е „доживотно инвалид“ и дека затоа не го платила соодветниот данок.
Нејзиното патување од тинејџерка самохрана мајка, до синдикален службеник, па до пратеник и заменик-премиер е реткост во британската политика.
Рејнер, која беше задолжена за политиката за домување во лабуристичката влада, честопати ги напаѓаше оние кои намерно плаќаат помалку даноци, а за ова особено ги напаѓаше членовите на претходната конзервативна администрација, која беше тешко поразена од лабуристите на изборите во јули 2024 година.
Ова сега ја изложи на обвинувања од опозицијата за лицемерие и лажење.
Како исклучително популарен член на Лабуристичката партија, таа се сметаше за потенцијален наследник на Стармер како лидер на партијата, а со тоа и на владата. Рејнер сега поднесе оставка од функцијата заменик-лидер на партијата, што предизвика реконструкција на владата.
