Британската полиција добива нови овастувања: Ќе го ограничи правото на протест

Британската полиција ќе добие овластувања да го ограничи правото на протести на исто место, соопшти денес британската влада, откако последниот пропалестински митинг се одржа и покрај повиците за негово откажување.

Новите овластувања ќе им овозможат на високите полициски службеници да го земат предвид кумулативното влијание на претходните протести врз локалната заедница, соопшти Министерството за внатрешни работи, пренесува „Ројтерс“.

„Правото на протест е фундаментална слобода во нашата земја. Сепак, таа слобода мора да се избалансира со слободата на нивните соседи да живеат без страв“, изјави британскиот министер за внатрешни работи Шабана Махмуд.

Министерството соопшти дека Махмуд, исто така, ќе ги разгледа постојните полициски овластувања за да се осигури дека се доволни и дека се применуваат доследно, вклучително и овластувањата за целосна забрана на протестите.

„Големите, повторени протести можат да остават делови од нашата земја, особено религиозните заедници, да се чувствуваат несигурно, заплашено и да се плашат да ги напуштат своите домови“, рече Махмуд.

Таа рече дека ова е особено очигледно во зголемениот страв во рамките на еврејската заедница.

Две лица беа убиени во Манчестер во четврток, на Јом Кипур, најсветиот ден за Евреите, при што полицијата го застрела вооружениот човек, Британец од сириско потекло, за кого официјални лица рекоа дека можеби бил инспириран од екстремистичката исламска идеологија.

Полицијата уапси речиси 500 луѓе во центарот на Лондон вчера на најновиот протест во поддршка на групата „Палестинска акција“, која беше забранета во јули откако нејзините членови упаднаа во воена база и оштетија воени авиони.

Британскиот премиер Кир Стармер ги повика организаторите на протестот да го откажат од почит кон тагата што ја чувствуваат британските Евреи.