Британија купува авиони кои носат нуклеарни бомби

Обединетото Кралство ќе купи 12 американски борбени авиони Ф-35 способни да носат нуклеарни бомби и ќе се придружи на заедничката воздушна нуклеарна мисија на НАТО, објави британскиот премиер Кир Стармер.

Само три членки на НАТО: САД, Велика Британија и Франција се нуклеарни сили, додека седум земји учествуваат во мисијата позната како „споделување на нуклеарно оружје на НАТО“, односно учествуваат во складирањето, обуката и потенцијалната употреба на американското тактичко нуклеарно оружје Б61, кое е распоредено во Европа.

Земјите учеснички обезбедуваат авиони и пилоти подготвени да го испорачаат ова оружје во војна, но нуклеарните бомби остануваат под американска контрола.

Британската влада го оцени купувањето на овие авиони како „најголемо зајакнување на нуклеарната позиција на Велика Британија во една генерација“.

Стармер го објави ова на самитот на НАТО во Холандија. Генералниот секретар на НАТО, Марк Руте, ја поздрави одлуката, нарекувајќи ја „уште еден силен британски придонес кон НАТО“.

Обединетото Кралство постепено го отстрани нуклеарното оружје кое се лансира од воздух во 1990-тите по завршувањето на Студената војна. Неговиот нуклеарен арсенал сега се состои од ракети лансирани од подморници.

За Велика Британија да употреби нуклеарно оружје, ќе ѝ треба одобрение од групата за нуклеарно планирање на Алијансата, како и од американскиот претседател и британскиот премиер.

Стармер, исто така, објави дека Велика Британија ќе обезбеди 350 ракети за воздушна одбрана на Украина, финансирани со 70 милиони фунти собрани од каматата за запленетиот руски имот.

Велика Британија моментално троши 2,3 проценти од БДП за одбрана и има за цел да ја зголеми таа бројка на 2,6 проценти до 2027 година.