Брајан Марсела, „Јо-јо бенд“, Милагрос Пињера во Скопје… за Меѓународниот ден на џезот  

Меѓународниот ден на џезот, 30 Април, во Скопје ќе се прослави со повеќе настани што ќе се одржуваат во паркот „Ибни Пајко“ и во Македонскиот народен театар, а во организација на Националниот џез-оркестар.

Денот на џезот е воспоставен во 2011 година, од УНЕСКО, а идејата потекнува од џез-пијанистот Херби Хенкок, кој е амбасадор на добрата волја. Настанот се одбележува со концерти, работилници, едукативни програми и со јавни настапи во повеќе од 190 земји во светот, обединувајќи ги заедниците, училиштата, уметниците и ентузијастите насекаде во светот. Џезот ја слави културната разновидност, промовира мир и меѓукултурен дијалог, ја поттикнува родовата еднаквост и ја истакнува слободата на изразување.

Оваа година, централната прослава на Денот на џезот ќе се одржи во Абу Даби, Обединетите Арапски Емирати. Настанот ќе биде предводен од легендарниот пијанист Херби Хенкок и воден од оскаровецот Џереми Ајронс, а ќе настапат низа најреномирани џез- артисти од светот, меѓу кои Курт Елинг, Диди Бриџватер, Маркус Милер, Артуро Сандовал, Данило Перез и други.

Кај нас, Меѓународниот ден на џезот ќе се прослави со концерт на американскиот пијанист Брајан Марсела и неговото трио, со кој нашата земја ќе го одбележи 30-годишниот јубилеј од воспоставувањето дипломатски односи меѓу Македонија и САД. Настапот на Марсела ќе биде во МНТ, во 18:00 часот.

Повеќето настапи за денот на џезот, пак, ќе се случуваат во паркот „Ибни Пајко“, и тоа од 16:00 часот до полниќ. Ќе почне со „Џезот за деца“ (16:00 ч.), настап на „Бојан Цветковиќ квартет“ од Србија (19:30 ч.), па ќе следува настапот на „Јо-јо бенд“ од Бугарија (20:30 ч.). Од 21:30 часот, во паркот „Ибни Пајко“, ќе настапи и „Христијан Ристески квартет“ (музичари од Македонија, САД, Словенија), а вечерта ќе заврши со Trio Dragobert feat. Milagros Piñera – латино џез-квартет со музичари од Куба и од Австрија (од 22:30 часот).

Како што посочуваат организаторите, во случај на неповолни временски услови, сите концерти ќе бидат префрлени во салата на Македонскиот народен театар.