Одлуката на севернокорејскиот лидер Ким Џонг Ун да ја именува својата ќерка Ким Џу-ае за наследник веројатно ќе предизвика борба за власт во владејачкото семејство, објавува британскиот весник Телеграф, повикувајќи се на извори од јужнокорејското разузнавање, додавајќи дека во тој случај Џу-ае би можела да се соочи со својата тетка Ким Јо-џонг.
Поранешниот јужнокорејски амбасадор во Велика Британија и поранешен заменик-директор на разузнавачката служба, Ра Џонг-ил, изјави дека Џу-ае би можела да се соочи со отпор од нејзината тетка, Ким Јо-џонг (38), полусестра на севернокорејскиот лидер, која се смета за втора најмоќна личност во земјата и ужива силна поддршка во рамките на Работничката партија на Кореја и воениот естаблишмент.
Според него, Ким Јо-џонг би можела да се обиде да ја преземе власта во случај на смрт или неспособност на нејзиниот брат, а со оглед на минатите практики на династијата Ким, секој потенцијален конфликт „веројатно нема да биде без крв“.
Историјата на справување со политичките ривали дополнително ги поттикнува ваквите проценки, истакнува британскиот весник.
Две години откако ја презеде власта од својот татко Ким Џонг Ил во 2011 година, Ким Џонг Ун го уапси, а потоа и егзекутираше својот чичко Џанг Сонг Тек, обвинет за „антипартиски и контрареволуционерни активности“.
Постариот полубрат на севернокорејскиот лидер, Ким Џонг Нам, беше убиен во 2017 година на аеродромот во Куала Лумпур со нервен агенс.
Националната разузнавачка служба (НИС) на Јужна Кореја му соопшти на парламентот во Сеул дека Ким (42) ја избрал својата ќерка Ким Џу-ае, за која се верува дека има околу 13 години, за свој очигледен наследник и интензивно се подготвува да ја преземе власта, што се докажува со нејзините сè почести појавувања покрај својот татко на важни воени и дипломатски настани.
Ким Џу-ае беше присутна покрај својот татко на тестови за балистички ракети и големи државни церемонии во последните години, што предизвика шпекулации дека таа систематски се подготвува за наследување.
Во исто време, шпекулациите за здравјето на севернокорејскиот лидер исто така растат.
Според медиумските извештаи, Ким Џонг-ун е тежок пушач и алкохоличар, страда од дијабетес и висок крвен притисок, а неговата телесна тежина е проценета на околу 140 килограми во 2024 година.
Американскиот истражувачки „Стимсон центар“ предупреди во декември минатата година, во анализа објавена на специјализираниот портал „38 Норт“, за можноста за „турбуленции“ во случај на ненадејна смрт на севернокорејскиот лидер, наведувајќи дека на краток рок е поверојатно да ја преземат власта политички етаблирани актери како што е сестрата на Ким, Ким Јо Џонг.
Во извештајот се додава дека Ким Џу-ае и нејзините браќа, за кои се верува дека се уште се малолетни, се премногу млади и недоволно политички профилирани за реално да се сметаат за наследници во следните пет до 15 години.
