Болтон: „Зеленски нема добро да помине ако продолжи да му држи лекции на Трамп“

Џон Болтон, поранешен советник за национална безбедност на претседателот Доналд Трамп, изјави дека украинскиот претседател Володимир Зеленски нема добро да помине доколку му држи лекции на американскиот претседател, „со оглед на тешката политичка положба во која се наоѓа Трамп во сопствената земја“.

Гостувајќи во емисијата „On Balance“ на каналот „NewsNation“, Болтон му рече на водителот Лиланд Витерт дека за Зеленски нема да биде корисно да го критикува Трамп, пренесува „The Hill“.

„Да бидеме искрени: сè што Трамп прави во моментов – без разлика дали станува збор за војна со Иран или за војната меѓу Русија и Украина – не се заснова на стратешки пресметки поврзани со националните интереси на Соединетите Држави“, рече Болтон.

„Тоа се заснова на изборни стравувања за тоа што би можело да се случи на 3 ноември. Како за почеток, Зеленски во моментов дури и не зборува на ист јазик како Трамп“, продолжи тој.

„И како што веќе реков, едноставно не верувам дека комуницирањето со Трамп на ваков начин – како деца на училиштен двор – некогаш служи на интересите на кој било друг.“

Витер потоа го праша Болтон дали Зеленски добива лоши совети за тоа како да „излезе на крај“ со Трамп.

„Да, мислам дека е така. Разбирам – Зеленски е лут и фрустриран. Мојот совет би бил тој да влезе во својата канцеларија, да ја затвори вратата и да вика кон ѕидот. Викањето кон Трамп само дополнително го провоцира“, одговори Болтон, додавајќи дека тврдењето на Трамп – оти украинските напади врз руските рафинерии за нафта доведуваат до пораст на цените на дизелот – го смета за „целосно бесмислено“.

Болтон, исто така, го критикуваше договорот на Трамп во врска со руската нафта, според кој 300.000 тони дизел би биле испорачани во Соединетите Држави и на светскиот пазар.

Тој изјави дека овој договор „повторно ѝ дава легитимитет на владата на Путин, која имаше сериозни тешкотии да изнесе какви било веродостојни аргументи во одбрана на своите постапки во Украина“.

Коментарите на поранешниот советник за национална безбедност доаѓаат по изјавата на Зеленски, дадена претходно оваа недела, дека енергетското примирје меѓу Русија и Украина е завршено. Според извештаите, во четвртокот продолжиле нападите со беспилотни летала врз руските рафинерии во регионот Рјазан, кој се наоѓа југоисточно од Москва.

Во неделата, Трамп објави дека е постигнато примирје, тврдејќи дека Кремљ се согласил да го почитува.

Според „Ројтерс“, по објавата во неделата, Киев ја обвини Русија за прекршување на примирјето и за продолжување на нападите врз Украина. Кога новинарите го прашаа за ова, Трамп одговори: „Ќе ве известам за тоа подоцна“.

„Тие се напаѓаат меѓусебно, но сè ќе заврши. Двете страни сакаат тоа да заврши; само не знаат како да стигнат до таму“, додаде тој.

Се очекува рускиот претседател Владимир Путин и Трамп, заедно со други светски лидери, да се сретнат овој декември на самитот на Г20 во Флорида.

Во интервју за германскиот медиум „Дојче веле“ во септември, Зеленски изјави дека е подготвен да присуствува на самитот за да се сретне со Путин.