Богатите се сѐ побогати, додека 3,8 милијарди луѓе сè уште живеат во сиромаштија

Богатството на само 3.000 милијардери се зголеми за 6,5 трилиони долари во реални услови од 2015 година и сега претставува еквивалент на 14,6 отсто од глобалниот бруто домашен производ (БДП)

Нееднаквоста меѓу луѓето во светот продолжува да расте, при што богатите стануваат побогати, додека 3,8 милијарди луѓе се сиромашни, соопшти невладината организација за развој „Oxfam“.

Богатството на милијардерите во земјите од Г20 се зголеми за 2,2 трилиони долари во изминатата година, соопшти „Oxfam“ во анализа објавена во четвртокот, пред самитот на Г20 оваа седмица. Според организацијата, оваа сума би била доволна за да се извлечат 3,8 милијарди луѓе од сиромаштија.

Богатството на само 3.000 милијардери се зголеми за 6,5 трилиони долари во реални услови од 2015 година и сега претставува еквивалент на 14,6 отсто од глобалниот бруто домашен производ (БДП).

Самитот на Г20 започна во саботата, во Јоханесбург. Групата ги обединува најголемите индустријализирани земји во светот и некои од најсилните економии во развој.

„Oxfam“ вели дека милијардерите во земјите од Г20 го зголемиле своето вкупно богатство за 16,5 отсто за една година – на 15,6 трилиони долари, во споредба со 13,4 трилиони долари минатата година.

Годишните трошоци на Светската банка за искоренување на сиромаштијата за 3,8 милијарди луѓе што моментално живеат под линијата на сиромаштијата, од 8,30 долари дневно, изнесуваат 1,65 трилиони долари, проценува „Oxfam“.

Организацијата ги повика лидерите на Г20 да се залагаат за создавање меѓународно тело за борба против нееднаквоста и за унапредување на напорите за оданочување на супербогатите.

Се очекува намалувањето на нееднаквоста да биде централна тема на самитот.