„Блумберг“: Украина можеби уште денеска ќе потпише договор за минералите со САД

Украина е подготвена да потпише договор за природни ресурси со САД, можеби уште денес, изјавија извори за „Блумберг“.

Нацрт-договорот, кој предвидува создавање заеднички фонд за управување со украински инвестициски проекти, е финализиран и може да биде потпишан денес, а украинската министерка за економија Јулија Свириденко е на пат кон Вашингтон за потпишување, велат изворите.

Како дел од договорот, САД и Украина ќе се обидат да создадат услови за „зголемување на инвестициите во рударството, енергијата и сродните технологии во Украина“, според нацрт-документот што го виде „Блумберг“.

Вашингтон, исто така, се согласи дека договорот нема да ги попречи напорите на Украина да се приклучи кон Европската Унија, што долго време се сметаше за црвена линија за Киев во преговорите.

Во исто време, САД се согласија дека само идната воена помош што може да ѝ ја обезбедат на Украина по потпишувањето на договорот ќе се смета за придонес на Вашингтон во фондот, се вели во документот.

Украинскиот премиер Денис Шмихал во неделата изјави дека Вашингтон се откажал од инсистирањето договорот да вклучува десетици милијарди долари помош доставена од почетокот на руската инвазија.

Договорот „го зајакнува стратешкото партнерство меѓу страните за долгорочна реконструкција и модернизација на Украина, како одговор на масовното уништување предизвикано од руската инвазија“, се вели во документот.

Два други технички договори што ќе го одредат начинот на кој ќе функционира заедничкиот фонд сè уште не се финализирани, рече изворот.

Американските и украинските претставници потпишаа меморандум за разбирање претходно во април и продолжија да ги разработуваат техничките детали од договорот, а претходниот обид за постигнување договор пропадна претходно оваа година откако украинскиот претседател Володимир Зеленски се судри со американскиот претседател Доналд Трамп и потпретседателот Џ.Д. Венс во Овалната соба.