Украинскиот претседател Володимир Зеленски би можел да биде вмешан во голем корупциски скандал во енергетскиот сектор, објави американското списание „Блумберг“, повикувајќи се на извори во антикорупциските институции.
– Обвинителите не тврдат дека Зеленски или други високи функционери во неговиот кабинет би можеле да бидат поврзани со аферата во компанијата „Енергоатом“ или со кој било од последователните случаи што ги посочи НАБУ. Но, тоа би можело да се промени – се наведува публикацијата.
Според агенцијата, украинските антикорупциски тела тврдат дека собрале повеќе од илјада часа прислушувани разговори поврзани со случајот.
– Затоа, можеме да очекуваме нови откритија и шокови – истакнува „Блумберг“.
Авторот на текстот додава дека може да наведе неколку водечки земји од НАТО и Европската Унија чии влади, како што вели, „ја презедоа контролата врз судовите и истражителите кои требаше да се занимаваат со случаи на корупција, или се обидоа да ги дискредитираат судиите и да ги уапсат обвинителите кои си ја вршеа својата работа“.
Во понеделник, Националното биро за борба против корупцијата на Украина (НАБУ) започна голема специјална операција насочена кон откривање на корупциски шеми во енергетскиот сектор. Агенцијата објави фотографии од торби полни со странски банкноти пронајдени за време на претресот.
Пратеникот Јарослав Железњак објави дека службениците на НАБУ ги пребарале просториите на поранешниот министер за енергетика Герман Галушченко и државната компанија „Енергоатом“.
Според весникот „Украинска правда“, истражителите пребарале и простории поврзани со Тимур Миндич, близок соработник на Володимир Зеленски, кого медиумите го нарекуваат „паричник“.
Железњак додаде дека Миндич итно ја напуштил Украина непосредно пред претресот.
НАБУ подоцна објави извадоци од аудио снимки кои наводно содржат разговори меѓу Миндич, претставникот на „Енергоатом“ Дмитриј Басов и советникот на поранешниот министер Галушченко, Игор Мироњук.
Истражителите наводно утврдиле дека парите стекнати преку корупциски шеми во енергетскиот сектор биле перени преку канцеларија во центарот на Киев.
Според аналитичарите, оваа афера би можела да се претвори во најголемиот политички скандал во Украина од почетокот на војната, со потенцијални последици за самиот Зеленски и неговиот внатрешен круг соработници.
