Благ пад на цената на суровата нафта на околу 95 долари за барел

Цените на суровата нафта Брент денес малку паднаа под влијание на тензиите меѓу САД и Иран, на околу 95 долари за барел, но пораснаа за речиси 8% на неделно ниво, најмногу од средината на јули.

Американската сурова нафта се тргуваше со околу 90 долари за барел, со неделно зголемување од речиси 9%, исто така најизразено од средината на јули, објави „Трејдинг економикс“.

Меѓусебните напади меѓу САД и Иран се обновија оваа недела за прв пат по околу еден месец, што повторно ги поттикна стравувањата од прекини во снабдувањето со нафта.

Расположението на пазарот беше под влијание и на предупредувањата од Израел дека тоа ќе ја „онеспособи“ иранската воена и цивилна инфраструктура.

Потпретседателот на САД, Џ.Д. Венс, изјави во четврток дека Вашингтон не планира да преговара со Техеран додека Иран не престане да напаѓа комерцијални бродови во Ормутскиот теснец.

Сепак, постојат индикации дека нафтата сè уште стигнува до пазарот, при што извозот на нафта од Ирак се зголеми во август и се очекува дополнително да се зголеми во септември.

Во меѓувреме, се очекува Организацијата на земјите извознички на нафта (ОПЕК Плус) да ја задржи својата политика за производство на нафта непроменета за октомври на состанокот во недела.