Бивша НБА-ѕвезда изгради 120 стана и им подаде рака на сиромашните

Поранешната НБА-ѕвезда, Алонзо Морнинг (55), заработи околу 150 милиони долари во текот на својата НБА-кариера и неодамна одлучи да инвестира дел од тие пари во нереален проект, за кој малкумина не би дале ни еден долар.

Популарниот Зо инвестираше 37 милиони долари во проект во Флорида. Тој изгради 120 стана, кои ги издава под наем на постари и на немоќни лица, кои не може да ги покријат високите трошоци за живот во Соединетите Американски Држави.

Оние со најниски приходи плаќаат само 322 долари кирија, додека највисоката е 1.316 долари, што е, сепак, далеку под просечната кирија во Флорида, која е околу 2.400 долари месечно.

За да се квалификува за изнајмување стан во овој комплекс, лицето мора да има најмалку 55 години и мора да достави доказ за потпросечен приход. Комплексот е за луѓе на кои им е потребен дом, но не може да си го дозволат.

Оваа заедница не располага само со домување. Внатре во комплексот има кафетерија со Интернет и кујна, вежбалница и место за дружење.

• Сè е дизајнирано да биде модерно, исто како скапите станови. Сè за да се чувствуваат постарите лица гордо што живеат тука. Овој проект им гарантира на постарите граѓани безбедност и удобен дом по прифатливи цени. Алонзо Морнинг покажа како може да им се помогне на сиромашните. Тој изгради нешто што ги менува животите на другите – пишуваат американските спортски медиуми.

Потоа се јави самиот Морнинг, кој зборуваше за овој проект.

• Сфатив дека постои одредена група што е занемарена и е исклучително сиромашна. Навивачите се тие што ме поддржуваа низ годините. Чувствувам дека ѝ должам нешто вакво на заедницата – порача Морнинг.

Тој некогаш беше голема НБА-ѕвезда. Играше во лигата од 1992 до 2008 година, поминувајќи го поголемиот дел од кариерата во тимот на Мајами. Пристигна во најсилната лига во светот како втор избор на драфтот во 1992 година, а беше избран од Шарлот, каде што порасна како ол-стар играч. Потоа следуваа години во Мајами, со краток престој во Њу Џерси. Тој ја заврши кариерата во 2008 година, со шампионски прстен во НБА со Мајами.

Седумкратниот ол-стар играч имаше големи здравствени проблеми, кои ѝ ставија крај на неговата кариера. Неговите бубрези откажаа и тој постојано се бореше со овие проблеми до 2003 година, кога беше подложен на трансплантација.

На 838 одиграни натпревари во НБА, тој имаше просек од 17,1 поен и 8,5 скока и се сметаше за еден од најдоминантните центри во текот на 1990-тите.