Биткоинот со нов рекорд, надмина 124 илјади долари

Биткоинот достигна ново историско високо ниво, надминувајќи 124.000 долари во четвртокот, откако пазарот реагираше на сигналите за можно олабавување на монетарната политика од страна на Федералните резерви на САД. Овој раст се надоврзува на претходните позитивни движења поттикнати од финансиските реформи и од зголемениот интерес од институционалните инвеститори.

Во исто време, етереумот, втората највлијателна криптовалута, се искачи на највисоко ниво од крајот на 2021 година, достигнувајќи цена од 4.780 долари.

Аналитичарите го поврзуваат растот на криптопазарот со зголемената веројатност за намалување на каматните стапки, како и со политичките потези на администрацијата на претседателот Доналд Трамп, кои се насочени кон олеснување на инвестирањето во дигитални средства. Според процените, доколку успее стабилно да се задржи над нивото од 125.000 долари, можно е биткоинот да се движи кон нова цел од 150.000 долари.

Од почетокот на годинава, биткоинот бележи раст од речиси 32 проценти, поттикнат од регулаторните промени и од поддршката што ја добива секторот од актуелната администрација. Трамп, кој јавно се декларира како поддржувач на криптовалутите, има активно учество во промовирањето на овој пазар, а неговото семејство во изминатите месеци презеде конкретни чекори во индустријата.