Градоначалникот на Киев, Виталиј Кличко, апелираше до европската јавност да не ја заборави Украина и до германскиот канцелар што е можно поскоро да ги испорача ракетите „Таурус“, нагласувајќи дека руските напади врз главниот град стануваат сè поинтензивни и дека жителите се соочуваат со терор ноќ по ноќ.
„Гледам облаци од чад над мојот град, слушам руски беспилотни летала и експлозии на ракети. Ова е чист терор што Владимир Путин го спроведува врз нас, секоја вечер, сè поинтензивно“, рече Кличко во авторски текст објавен во германскиот весник „Билд“.
Според него, жителите на Киев ги поминуваат ноќите криејќи се во подземни засолништа и метро станици. И покрај постојаните напади врз цивилната инфраструктура, градските служби продолжуваат да функционираат, нагласи тој.
Кличко оцени дека ситуацијата на фронтот е исклучително тешка и дека на украинските вооружени сили итно им е потребно дополнително оружје, првенствено воздушна одбрана за заштита на градовите.
Тој ѝ се заблагодари на Германија за досегашната помош, наведувајќи дека германската воздушна одбрана спасила илјадници животи, но додаде дека тоа не е доволно.
„Одговорот на Европа на ескалацијата на Путин мора да биде поголема поддршка за Украина. Канцеларот Фридрих Мерц со право рече дека продолжувањето на руските напади врз цивилни цели мора да доведе до испорака на ракети „Таурус“. Се надеваме дека новата германска влада ќе го одржи својот збор“, нагласи Кличко.
Тој додаде дека само во Киев се уништени повеќе од 2.000 згради и дека речиси секој ден има смртни случаи и повредени, пренесува „Танјуг“.
„Путин сака да ни го скрши духот. Но, нема да успее“, заклучи градоначалникот на Киев.
