Швајцарскиот производител на чоколадо и какао „Бари Калебо“ (Barry Callebaut) очекува значително пониски цени на какаото до крајот на годината, според бизнис извештај објавен вчера.

Покрај чоколадото, „Бари Калебо“ произведува и производи од какао за угостителската индустрија и за производителите на пралини и чоколадиери. Цените на какаото беа во просек за 27,1 процент повисоки во фискалната 2024/2025 година отколку во 2023/2024 година, поради послабата жетва во Западна Африка од февруари, што беше само делумно компензирано од „позитивните трендови“ во други земји, особено во Еквадор. Од септември 2023 година до крајот на август оваа година, цените на какаото се зголемија за 82 проценти на пазарите, покажува презентацијата.

Побарувачката за какао значително ослабе во периодот од април до август, што се одразува и во намалениот обем на преработка во пролетните месеци. Пред половина година, швајцарската компанија предвиде дека цените на какаото ќе бидат 5.700 фунти (7.423 долари) по тон до крајот на оваа календарска година. Сега, сепак, тие проценуваат дека ќе биде 4.400 фунти.

Тие очекуваат иста цена во декември 2026 година, додека пред шест месеци предвидоа дека еден тон какао ќе чини 5.150 фунти. Во фискалната 2024/2025 година, компанијата продала нешто повеќе од два милиони тони чоколадо, што е за 6,8 проценти помалку отколку во 2023/2024 година.

Нејзините приходи, сепак, се зголемија за дури 42,2 проценти – на 14,8 милијарди швајцарски франци (15,9 милијарди евра) – поради повисоките цени на какаото што ги пренесоа на клиентите. Оперативната добивка (EBIT) се зголеми за 42,4 проценти, на 635,1 милиони франци.

Калебо, исто така, се обидува да се позиционира на пазарот на чоколадо без какао и соработува со германската компанија Планет А Фудс, која веќе произведува алтернатива на чоколадо наречена ChoViva, направена од семки од сончоглед, наведува новинската агенција dpa.

ИЗДВОЕНИ

ПОВРЗАНИ ОБЈАВИПОВЕЌЕ ОД АВТОРОТ