Илјадници луѓе се собраа низ САД во саботата за да протестираат против претседателот Доналд Трамп пред воената парада во Вашингтон по повод 250-годишнината од американската војска, што се совпаѓа со роденденот на Трамп.
На митингот во Атланта, илјадници демонстранти се собраа пред бариерите за да ги слушнат говорниците пред државниот Капитол.
Во Минесота, организаторите ги откажаа демонстрациите додека полицијата работеше на пронаоѓање на осомничениот за пукањето врз двајца демократски пратеници и нивните сопружници.
Во Филаделфија, демонстрантите скандираа „Чии улици? Нашите улици!“, а демократскиот пратеник Џејми Раскин ја праша толпата од подиумот „дали се подготвени да возвратат“ и да се борат, објавува АП.
Илјадници се собраа пред Градското собрание во Лос Анџелес, стотици на тревникот на државниот Капитол на Мисисипи, а демонстрантите во центарот на Литл Рок преминаа мост преку реката Арканзас.
Организаторите изјавија дека протестите се планирани на речиси 2.000 локации низ целата земја, од градски блокови и мали градови до скали пред судовите и паркови, но не се закажани никакви настани во Вашингтон, каде што вечерта ќе се одржи воена парада.
Движењето 50501, кое ги организира протестите, соопшти дека го избрало името „Без кралеви“ за да ја поддржи демократијата и да се спротивстави на „авторитативните постапки на администрацијата на Трамп“.
Името „50501“ е кратенка за 50 држави, 50 протести, едно движење.
