Белорусија уапси полски државјанин под сомнение за шпионажа поради поседување документи поврзани со претстојните заеднички воени вежби меѓу Белорусија и Русија, објавија државните медиуми. Белоруската државна новинска агенција Белта, повикувајќи се на телевизијата Белорусија-1, објави дека агентите на државната безбедност привеле маж во градот Лепел, источно од главниот град Минск, како и дека е приведен белоруски државјанин.
Белта објави дека осомничениот поседувал копија од документ во кој се опишани вежбите „Запад 2025“ закажани да се одржат овој месец.
„Постојат неоспорни докази за шпионските активности на полскиот државјанин. Неколку минути пред неговото апсење, тој добил таен воен документ. Сето ова е снимено на видео“, напиша државната новинска агенција.
Исто така, се тврди дека се обидел да регрутира белоруски државјанин нудејќи му пари и мали подароци.
Полска реагираше веднаш, наведувајќи дека потегот е провокација на која треба да се одговори.
„Апсењето е уште една провокација од страна на режимот на Лукашенко насочена против нашата земја“, напиша на X Јацек Добжински, портпарол на координаторот на полските специјални служби.
