БДП идната година ќе биде над 10 илјади долари по глава на жител

Номиналниот домашен бруто-производ по глава на жител идната година ќе надмине 10 илјади долари, изјави премиерот Христијан Мицкоски. Тој рече дека очекува растот на реалниот домашен бруто-производ да биде над 3,5 % годинава, а на номиналниот – повеќе од 7,5 %. Повтори дека во октомври инфлацијата ќе биде нешто над трендот во изминатите месеци, односно дека ќе се движи меѓу 4 и 4,5 проценти поради ниското ниво минатата година.

– Очекувам пристојно намалување во ноември и во декември, така што просечната годишна стапка на инфлација оваа година ќе заврши меѓу 3,5 и 4 проценти, што е една од најниските во Европа и во регионот – рече Мицкоски.

Истовремено, додаде дека очекува следната година нивото на инфлација да се движи меѓу два и три проценти.

Од друга страна, очекува растот на реалниот домашен бруто-производ да биде над 3,5 проценти, а на номиналниот – над 7,5 проценти.

– Ќе се приближиме до целта на оваа Влада, а тоа е до крајот на мандатот да имаме бруто домашен производ од 20 милијарди долари. Тој број ќе го стигнеме веќе следната година и оваа година првпат номиналниот домашен бруто-производ по глава на жител ќе има петцифрен број во долари. Односно, над 10 илјади долари ќе биде домашниот бруто-производ по глава на жител – рече Мицкоски.

Тој посочи дека со тоа, стратешките цели што ги планирале за крајот на мандатот на оваа Влада, ќе бидат реализирани следната година.

– Што е добро и охрабрувачки. Тоа е практично и дел од извештајот на Европската комисија за напредокот на земјава, но, исто така, и сите меѓународни финансиски институции ги нивелираат и ги зголемуваат прогнозите и проекциите за раст на економијата во државата – рече Мицкоски.