Барселона ги „удира“ туристите по џеб: Драстично зголемена такса од април!

Доколку планирате патување во Барселона, од април оваа година можете да очекувате туристичка такса до 15 евра по ноќ, објавија властите во каталонската престолнина.

Оваа одлука претставува значително зголемување во споредба со претходните 5 до 7,50 евра по ноќ и е меѓу највисоките такси во Европа, објавува Travel and World Tour.

Новата такса ќе се применува за гостите на хотели и сместувачки капацитети за одмор, а износот зависи од категоријата на објектот. На пример, престојот во хотел со четири ѕвездички може да чини до 11,40 евра по лице по ноќ, додека хотелите со пет ѕвездички наплаќаат максимум 15 евра. Гостите во сместувачки капацитети за одмор ќе плаќаат такса до 12,50 евра по ноќ.

Даночните приходи се наменети за финансирање на проекти за прифатливо домување, бидејќи растечката популарност на краткорочните изнајмувања предизвикува зголемување на цените на изнајмувањето за локалните жители. Регионалниот парламент на Каталонија планира целосно да ги укине краткорочните изнајмувања до 2028 година, во согласност со политиката за контрола на масовниот туризам.

Со овој потег, Барселона се приклучува на голем број европски градови кои наплаќаат туристичка такса. Во Италија, градови како Рим, Венеција и Фиренца наплаќаат од 3 до 7 евра по ноќ, додека Венеција дополнително ги оданочува дневните посетители за да го заштити културното наследство. Париз и другите француски градови наплаќаат до 4 евра по ноќ, додека Берлин воведува данок од 7,5% на цената на сместувањето. Амстердам применува данок од 12,5% на хотелските резервации, а градовите во Швајцарија како Цирих и Женева наплаќаат од 2 до 4 швајцарски франци по ноќ.

Зголемувањето на таксата во Барселона има за цел да го намали притисокот врз ресурсите на градот, да го поттикне одговорниот туризам и да го олесни пристапот до домување за локалните граѓани, а во исто време да придонесе за поодржливо управување со една од најпосетуваните дестинации во Европа.