Жителите на Љубојно велат дека ќе останат на блокадите сè додека не добијат официјално ветување од надлежните институции дека сечата на шумата над преспанското село ќе запре и нема одново да се активира. Тие речиси еден месец протестираат.
Жителите на ова место, како и сопствениците на викенд-куќите и симпатизери од други краишта на државата и на празникот Денот на независноста, се собраа да го искажат својот револт од одлуката на јавното претпријатие „Национални шуми“ да дозволи гола сеча на дабовата шума во непосредна близина на селото на својот концесионер, фирмата „ДИБА Трејд“, од охридското село Косел.
Жителите на преспанско Љубојно со секојдневните протести кои почнаа уште на почетокот на август, успеаја, барем засега, да ја запрат сечата на шумата која се одвиваше над селото во близина на црквите „Свети Атанас“ и „Свети Петар и Павле“.
Велат дека откако почнале да протестираат, веќе ги нема камионите кои биле вклучени во сечата, а повлечени биле и тракторите заедно со сечачите и нивната опрема. Се сомневаат дека причина за тоа се скорешните локални избори.
Жителите облечени во маици „Сите го сакаме Љубојно“, секој ден излегуваат на протести од 9.30 до 11 часот.
