Најгледаната балетска претстава за деца, „Доктор Офболи“, на 31 јануари, во Националната опера и балет, ќе се изведе во два термина, од 17.00 и 19.00 часот.
Весела, разиграна и полна со фантазија, балетската претстава во два чина ги води децата низ свет на храброст, пријателство и добрина.
Со музика, бои и танц, оваа приказна носи радост и јасна порака дека доброто секогаш го наоѓа својот пат.
По музика на Игор Морозов, а според сказната на К. Чуковски, кореографијата ја подготви Михаил Крапивин од Русија. Сценограф е Живојин Трајановиќ, а костимограф Марија Пупучевска.
Настапуваат солисти и балетскиот ансамбл на Националната опера и балет.












