Бакнувањето може да пренесе депресија и анксиозност

Добро е познато дека бакнувањето и другите форми на близок контакт можат да пренесат инфекции како што се обичната настинка, мононуклеозата и херпесот, но според нова студија спроведена во Иран, депресијата и анксиозноста може да се шират и преку бакнување.

Депресијата и анксиозноста предизвикуваат ослободување на хормонот на стрес кортизол, кој може да ја наруши деликатната рамнотежа на бактериите во устата. Партнерите можат да ги пренесат овие бактерии еден на друг преку бакнување, а претходните истражувања покажаа дека до 80 милиони бактерии можат да се пренесат само во еден бакнеж од десет секунди, пишува Њујорк пост.

Авторите на новата студија открија интересна поврзаност: кога едниот партнер има проблеми со менталното здравје и спиењето, по шест месеци другиот партнер може да почне да покажува слични симптоми. Истражувачите веруваат дека бактериите што се пренесуваат преку бакнување се одговорни.

„Кога еден од партнерите страдал од депресија или анксиозност, бактериите во устата на здравиот сопружник биле многу слични на оние на оној што имал психолошки проблеми“, објавија научниците во списанието „Exploratory Research and Hypothesis in Medicine“.

Во студијата учествувале 268 млади брачни парови во Иран. Кај некои парови, едниот партнер имал симптоми на депресија, анксиозност и проблеми со спиењето на почетокот, додека другиот бил здрав и немал такви проблеми. Сите учесници пополниле прашалници за нивното ментално здравје, а истражувачите зеле примероци од плунка за да ги измерат нивоата на хормонот на стрес кортизол и собрале бактерии од нивните усти за детална ДНК анализа.

Резултатите покажале дека по шест месеци, здравите партнери, особено жените, почнале да покажуваат повеќе симптоми на депресија, анксиозност и проблеми со спиењето, иако овие симптоми не биле толку сериозни како оние на нивните партнери. Во примероците од плунка биле пронајдени четири вида бактерии и биле присутни во поголеми количини: Clostridia, Veillonella, Bacillus и Lachnospiraceae. Некои од овие бактерии можат да бидат штетни за здравјето.

Истражувачите забележаа дека студијата имала некои ограничувања, како што е неземањето предвид на претходно постоечките здравствени состојби или навиките во исхраната на учесниците, кои можат да влијаат на бактериите во нивните усти. Истражувачите велат дека идните истражувања треба да испитаат дали овие бактерии можат да играат улога и во други психолошки и невролошки нарушувања.

Ова ново истражување сугерира дека бактериите во нивните усти може да бидат делумно одговорни за овој ефект. Покрај тоа, претходните истражувања покажаа дека партнерите можат да бидат усогласени на други начини, како што е координирањето на срцевиот ритам, моделите на спиење, па дури и нивоата на стрес и репродуктивни хормони.