Официјални лица во администрацијата на американскиот претседател Џо Бајден изјавија дека од идната администрација на Доналд Трамп ќе зависи дали сеопфатните санкции за рускиот енергетски сектор ќе останат во сила или ќе бидат укинати.
Транзицискиот тим на Трамп не одговори веднаш на барањето на Асошиетед прес за коментар за санкциите воведени во петокот, но Трамп им рече на новинарите во четвртокот дека рускиот претседател Владимир Путин „сака да се сретнеме и ние се договараме околу тоа“.
Добриот однос на Трамп со Путин е сериозен проблем со години, а идниот републикански претседател исто така не се согласува со нивото на помош за Киев, ветувајќи дека ќе преземе чекори за ставање крај на војната во Украина веднаш по неговото враќање на функцијата на 20 јануари.
Трамп додаде нова доза на сомнеж за идната американска поддршка за Киев претходно оваа недела, кога се чинеше дека ја разбира позицијата на Путин дека Украина не треба да биде дел од НАТО и ја критикуваше администрацијата на Бајден за изразувањето поддршка за евентуалното членство на Киев во трансатлантската воена алијанса, јавува Гласот на Америка.
Во случај администрацијата на Трамп да се придвижи кон укинување на санкциите, прво ќе треба да го извести Конгресот, кој ќе има опција да гласа против таквиот потег.
