Бадентеровото правило во одредени моменти ја доведува во прашање функционалноста на државата, истакна лидерот на Движењето ЗНАМ за наша Македонија, Максим Димитриевски, коментирајќи ја изјавата на министерот за правда, Игор Филков, дека Бадентеровото мнозинство се злоупотребува и оти можеби е време за негово ревидирање.
– Изјавата на министерот Филков се однесува исклучиво за функционалноста на Бадентеровото правило. За нас како политички субјект, Рамковниот договор е завршена работа, апсолвирана и тој во целост е исполнет и реализиран. Но факт е дека во одредени моменти правилото на Бадентер ја доведува во прашање функционалноста на државата и тоа веќе со потврда ќе го имаме по завршувањето на локалните избори, рече Димитриевски.
Тој подвлече дека партијата го поддржува Рамковниот договор и оти е во целост исполнет, но одредени политички субјекти го злоупотребуваат Бадентеровото мнозинство.
Од ДУИ, возвратија дека Димитриевски отвора нов фронт, а од „Вреди“ дека во Бадентер и Охридскиот рамковен договор се темелите на државата и дека во кампања за локални избори треба да се занимаваат со проблемите на граѓаните. Потпретседателот на ДУИ, Арбр Адеми, истакна дека ваквите идеи од политички сили и политичари кои мислат дека мултиетничките држави не се функционални, се опасни.
Од ЗНАМ за Наша Македонија порачаа дека стојат на страна на граѓаните – на сите граѓани, без разлика на етничка припадност и дека нивната борба не е против заедниците, туку против коруптивниот систем што го задушуваше развојот и еднаквоста во Македонија.
– За нас, како политички субјект, Рамковниот договор е завршена работа – апсолвирана и во целост исполнета. Изјавите на ДУИ се уште еден очајнички обид да се префрли вината од сопствените 20 години коруптивна и партиска влада врз другите. ДУИ не може да зборува за „темели на мултиетничко општество“ кога токму нивните партиски послушници преку „балансерот“ ги уништуваа институциите и го поставуваа сопствениот интерес над законот. Со „балансерот“ не се вработуваа чесни граѓани од сите заедници – туку свои блиски, братучеди и партиски послушници! На тој начин, се создаде паралелна држава во која членската книшка на ДУИ вредеше повеќе од диплома, знаење или труд, се вели во реакцијата.
